1. Daudni de, Abrahamni de, Jisu Kristoni skang chasongrangni ki∙tap.
2. Abraham Ishakko ba∙aha ; aro Jacob Juda aro uni jonggiparangko ba∙aha;
3. Aro Juda Tamaroni Perezmu Zerako ba∙aha; aro Perez Hezronkon ba∙aha; aro Hezron Ramko ba∙aha;
4. aro Ram Amminadabko ba∙aha; aro Amminadab Nahsonko ba∙aha ; aro Nahson Salmonko ba∙aha ;
5. Aro Salmon Rahaboni Boazko ba∙aha ; aro Boaz Ruthoni Obedko ba∙aha ; aro Obed Jesseko ba∙aha;
6. Aro Jesse Daud rajako baaha. Aro Daud Uriani jikoni Solomonko ba∙aha ;
7. aro Solomon Rehoboamko ba∙aha ; aro Rehoboam Abijako ba∙aha ; aro Abija Asako ba∙aha ;
8. Aro Asa Jehoshaphatko ba∙aha ; aro Jehoshaphat Joramko ba∙aha ; aro Joram Uzziako ba∙aha ;
9. Aro Uzzia Jothamko ba∙aha ; aro Jotham Ahazko ba∙aha ; aro Ahaz Hezekiako ba∙aha ;
10. Aro Hezekia Manasseko ba∙aha ; aro Manasse Amonko ba∙aha ; aro Amon Josiako ba∙aha ;
11. Aro Babylonchi re∙angani salo Josia Jekonia aro uni jonggiparangko ba∙aha.
12. Aro Babylonona re∙angmano Jekonia Shealtielko ba∙aha ; aro Shealtiel Zerubbabelko ba∙aha ;
13. Aro Zerubbabel Abiudko ba∙aha ;aro Abiud Eliakimko ba∙aha ; aro Eliakim Azorko ba∙aha ;
14. Aro Azor Sadokko ba∙aha ; aro Sadok Akimko ba∙aha ; aro Akim Eliudko ba∙aha;
15. Aro Eliud Eleazarko ba∙aha ; aro Eleazar Matthanko ba∙aha ; aro Matthan Jacobko ba∙aha ;
16. Aro Jacob Mariamni se Josephko ba∙aha. Ia Mariamo Jisu atchiaha; jeko Kristo minga.
17. Indake Abrahamoni Daud ona kingking gimik chasong 14 , aro Daudni Babylonona re∙angaona kingking chasong 14, aro Babylonona re∙angaoni Kristoona kingking chasong 14.
18. Jisu Kristoni atchia indake ong∙aha. Uni ma∙gipa Mariamko Josephna kupakmano, uamangni damsan dongna skangan, Gisik rongtalgipaoni ong∙e, uni oko keako uina man∙aha.
19. Aro uni segipa Joseph toromi ong∙ani gimin, uko parake kratcha∙atna sikgija, uko sriksrik galna mangsongaha.
20. Indiba iarangko chanchimitingo, nibo, Gitelni sa∙gre jumangchi una mikkang pa∙e aganaha, O Daudni depante , Joseph, na∙a nang∙ni jikgipa Mariamko antangona rimbana da∙ken ; maina uni oko kegimin Gisik Rongtalgipaoni ong∙a.
21. Ua depanteko ba∙gen ; aro na∙a uni bimungko Jisu mingna nanggen, maina ua an∙tang manderangko uamangni paprangoniko jokatgen.
22. Ia pilakan ong∙aha, maikai katchinikgipachi agangimin Gitelni ia kata chu∙sokgen,
23. Nibo, ua me∙tra oko kegen, aro depanteko ba∙gen, Aro uamang uni bimungko Immannuel minggen ; uko pe∙skaon , Ching baksa Isol, ong∙a.
24. Aro Joseph tusiaoni chakate Gitelni sa∙greni ge∙eta gita jiktangko an∙tangona rimbaaha ;
25. Aro depanteko ba∙jana kingking ua uko u∙ikujachim ; aro ua ua deni bimungko Jisu mingaha.
1. Herod rajani salo Judeani Bethlehemo Jisuni atchimano, nibo, u∙igipa manderang salaramchi Jerusalemona re∙bae aganaha,
2. Jihudirangni raja atchigipa bao ? Maina chinga salaramchi uni askiko nikaha, aro uko olakina re∙baaha.
3. Iako Herod raja knaoa ua aro un baksa Jerusalem gimik jajrengaha.
4. Aro ua pilak kamal dal∙giparangko aro manderangna sastro skigiparangko rimchimonge sing∙aha, Kristo bao atchigen?
5. Uamang una aganaha, Judeani Bethlehemo ; maina katchinikgipachi indake sea gnang,
6. Aro na∙a Bethlehem, Judani a∙song, Na∙a Judani pamongrangni gisepo mamung dakeba chonbatja, Maina nang∙oni pamong ong∙katgen, Ua angni mande Israelrangko nirikgen.
7. Unon Herod ua u∙igipa manderangko sriksrik okame , ua aski basako ong∙katachim , uko namedake sing∙aha.
8. Aro uamangko Bethlehemona watate ua aganaha, Na∙simang re∙ange namedake ua bi∙sani gimin am∙e nibo ; aro nikmanahaoa angnaba aganebo, maikai angaba re∙ange uko olakina man∙gen.
9. Rajani aganako knae uamang re∙angaha. Aro nibo, salaramchi je askiko nikachim, ua, jeo bi∙sa gnangchim uani kosakona sokange tom∙tom dongjaskal, uamangna skang skang re∙angaha.
10. Askiko nike uamang namen katchabeaha.
11. Aro uamang nokningchi nape uni ma∙gipa Mariam baksa ua bi∙sako nikaha ; unon uamang tuchikope uko olakiaha ; aro an∙tangtangni gam donchakanirangko oe on∙anirangko, sona aro kunduru aro murko on∙aha.
12. Herodona re∙pilangjachina jumangchi Isolni beng∙ani gimin, uamang rama gipinko songtangchina re∙angaha.
13. Uamangni re∙angmano , nibo, Gitelni sa∙gre Josephna jumangchi mikkang pa∙e inaha, Chakatbo ua bi∙sako aro uni maako rime Egypt a∙songchi katangbo, aro angni nang∙ko aganjana kingking unon dongbo ; maina Herod bi∙sako nisina uko am∙nasia.
14. Unon ua chakate walo bi∙sako aro uni ma∙ako rime Egypt a∙songona re•angaha ;
15. Aro Herodni sijana kingking uano dongaha ; maikai katchinikgipachi agangimin Gitelni ia katta chu∙sokgen, Anga Egyptoniko an∙tang depanteko okamaha.
16. Unon Herod ui∙gipa manderangni an∙tangko tol∙pinapako nike ka∙onangbeaha, aro u∙igipa manderango namedake sing∙e je salko u∙iachim, uandaken bilsi gni aro uko sokgijagipa bilsini me∙a bi∙sa Bethlehemo aro uni sepango gnang kakketko , mande watate so∙otataha.
17. Unon Jeremia katchinikgipachi agana ia katta chu∙sokaha,
18. Ramao ku∙rangko knaaha, Grapa aro namen kalimani ; Rahel detangrangna grapa, Aro ka∙dimena sikjachim, maina uamang dongja.
19. Herod simanoa, nibo , Gitelni sa∙gre Egypto Josephna jumangchi mikkang pa∙e inaha,
20. Chakatbo, ua bi∙sako aro uni ma∙ako rime Israel a∙songona re∙angbo; maina bi∙sani janggiko am∙giparang siaha.
21. Unon ua chakate bi∙sako aro uni ma∙ako rime Israel a∙songona re∙baaha.
22. Indiba Judeao an∙tang pagipa Herodni biapo Arkelaus raja kam ka∙enga ine knaemung uona re∙angna kenaha ; aro jumangchi Isolni geetako man∙e Galili jolona re∙ange
23. Nazareth minga songo songdongeaha ; maikai, Uko Nazarethnigipa minggen, ine katchinikgiparangchi agana kata chu∙sokgen.
1. Uororo Johan Baptize ka•atgipa re•bae Judeani bakrao aganprake inaha, Gisik pil•bo;
2. Maina salgini songnok sepangaha.
3. Maina ian ua jeni gimin Isaia katchinikgipachi indake aganaha, Bakrao aganprakgipa saksani ku•rang ; Gitelni ramako daksobo, Uni re•aniko dimbrengatbo.
4. Ua Johanni ba•ra utni kimilko daka, aro kangkare kaa matbigilni, aro uni cha•ani gukrang aro burungni bija bitchi ong•achim.
5. Unon Jerusalem aro pilak Judea aro Jordanni sepang jolrang pilakan uni mikkangona re•ange,
6. an•tangtangni papko ku•rachake Jordan chibimao uni jakchi baptize ka•atako man•aha.
7. Indiba Pharisi aro Sadukkirangoni bang•en an•tangni baptize ka•ataona re•baako nike, ua uamangko inaha, O chipuni ma•drang, ka•onanggnioni katchina sa na•simangko de•mesaaha?
8. Uni gimin gisik pil•ana krakra biteko nangbo.
9. Aro, chingni paa Abraham gnang ine, agana chanchinabe, maina anga na•simangna agana, Isol Abrahamna ia ro•ongrangoniko dedrangko atchiatna ama.
10. Aro bolrangni ja•pango da•oba rua dona gnang : uni gimin nama biteko nanggijagipa bolantiko den•pee wa•alo gala.
11. Angade gisil pil•ana chio na•simangko baptize ka•ata; indiba angni ja•manchi re•baenggipa angna bilakbata ; uni ja•kopko ra•timna anga nitopaja.Ua na•simangko Gisik Rongtalgipao aro wa•alo baptize ka•atgen.
12. Uni jako uni ruan gnang, ua an•tangni nakramko namedake rongtalatgen, aro an•tangni miko jamo chimonggen , indiba bebuko kimitna amgijagipako wa•alo so•gen.
13. Unon Johanni jakchi baptize ka•atako man•na ine Jisu Galilioni uni mikkangona , Jordanona re•bara.
14. Indiba, Angasa nang•oni baptize ka•atako man•na nanga, indiba na•a angona re•baama ine , ua uko beng•engachim.
15. Indiba Jisu aganchake una inaha, Da•o ong•na on•kubo , maina indake darang toromko chu•sokatan an•chingna kraa. Unon ua una on•aha.
16. Unon Jisu baptize ka•atako man•e chioni bakan gakataha ; aro nibo, una salgirangko oaha, aro ua Isolni Gisikni paroa gita ong•onbaako, aro an•tangni kosakona re•baako nikaha.
17. Aro nibo, Ian angni ka•sara Depante, iano anga namnikbea ine salgioni ku•rangko knaaha.
1. Unon Diabolni dakmajoako man•na Jisu Gisikchi bakraona rimangako man•aha.
2. Aro sal sotbri wal sotbri okumu chakmanoa ua okkriaha.
3. Unon dakmajogipa re•bae una aganaha, Na•a Isolni De ong•ode , ia ro•ongrangko pita pil•china aganbo.
4. Indiba ua aganchake inaha, Sea gnang, Mande pitaarichi tangjawa, indiba Isolni ku•sikoni ong•katgipa pilak kattachi tanggen.
5. Unon Diabol uko rongtalgipa songjinmaona rimange, torom nokni protchongo chadengate una aganaha,
6. Na•a Isolni De ong•ode , chokonbo; maina sea gnang, Ua nang•ni gimin antang sa•grerangko ge•etgen ; Aro na•a ro•ongo nang•ni ja•ako nangtingatjana gita, Uamang an•tangtangni jakrango nang•ko de•tomgen.
7. Jisu una inaha, Aroba sea gnang, Na•a an•tang Isol Gitelko dakmajonabe.
8. Pil•e Diabol uko namen chubegipa a•briona rimange a•gilsakni pilak songnokrangko, aro uarangni rasongko mesokaha ;
9. Aro una aganaha, Na•a angko tuchikope olakkiode, anga iarangko nang•na on•tokgen.
10. Unon Jisu uko inaha, Ianoni katangbo, Satan ; maina sea gnang, Na•a an•tang Isol Gitelko olakkibo, aro ukosan manibo.
11. Unon Diabol uko watangaha, aro nibo, sa•grerang re•bae una dangdike on•eaha.
12. Aro Johanko jako on•aha inako knaon, ua Galiliona re•angaha;
13. Aro Nazarethko wate , sagal rikamo, Zebulun aro Naphtalni arigriko donggipa Kapernaumo dongeaha;
14. Maikai Isaia katchinikgipachi indine agana chu•sokgen,
15. Zebulun a•song aro Naphtalini a•song, Jordan nalsao sagalchibara, Gipin jatrangni Galili,
16. Je manderang andalao asongengachim, Uamang seng•beako nikaha, Aro je manderang siani a•song aro jagringo asongengachim, Uamangna seng•a naaha.
17. Untaltal Jisu aganprakna a•bachenge aganaha, Gisil pil•bo, maina salgini songnok sepangaha.
18. Aro Galilini sagal rikamo re•roromitingo Pitor minggipa Simon, aro uni jongtang Andrew, ia adasako sagalo chek galengako ua nikaha ; maina uamang na•tok rim•gipachim.
19. Unon ua uamangko aganaha, Imbo, ang jaman jaman ; anga na•simangko mande rim•giparang dakgen.
20. Unon uamang bakan chekrangko wate un baksa re•angpaaha.
21. Unoni re•ange ua gipin adasa, Zebedeeni de Jakob aro uni jonggipa Johanko, uamangni paa Zebedee baksa ringo uamangni chekrangko tariengako nike, uamangko okamaha.
22. Unon uamang bakan ringko aro an•tangmangni paako wate un baksa re•angpaaha.
23. Aro Jisu pilak Galilio reroroe uamangni gilja nokrango skiaha, aro songnokni nama kattako aganprakaha, aro manderangni gisepo pilak biatirang aro pilak bilgriarangko an•sengataha.
24. Unon Syria gimikona uko mingsinga gipangaha ; aro uamang pilak sagiparangko , ma•manti biati aro saknaa man•giparang , aro kore chagiparang , aro dekdeke gitilgiparang , aro an•ma goka ong•giparangko uona rimbaaha; aro ua uamangko an•sengataha.
25. Unon Galili aro Dekapolis aro Jerusalem aro Judea aro Jordan-ni nalsaoni jinma bang•a un baksa re•angpaaha.
1. Aro ua jinmarangko nike a•briona doangaha. Unon ua asongoa uni sninggiparang uona re•baaha,
2. Aro ua ku•sik oe uamangna indine skiaha,
3. Gisiko kangalgiparang an•senga ; maina salgini songnok uamangnin.
4. Kalimgiparang an•senga; maina uamangko ka•dimeatgen.
5. Sontolgiparang an•senga ; maina uamang a•ako man•rikgen.
6. Toromna okkrigipa aro ringna sikgiparang an•senga; maina uamangko okkaatgen.
7. Ka•sachakgiparang an•senga ; maina uamang ka•sachakako man•gen.
8. Ka•tong rongtalgiparang an•senga ; maina uamang Isolko nikgen.
9. Nangrimatgiparang an•senga ; maina uamangko Isolni depanterang ine ingen.
10. Toromni a•sel a•rika man•giparang an•senga; maina salgini songnok uamangnin.
11. Na•simang an•senga, jensalo manderang angni a•sel na•simangko intekgen, aro a•rikgen, aro tol•e ma•manti namgijako agangen.
12. Na•simang katchabo, aro ka•srokbo ; maina salgio na•simangni man•gni bang•a ; maina uamang na•simangna skanggipa katchinikgiparangko indaken a•rikachim.
13. Na•simang a•ani kari ; indiba karini su•ua gimaode, maichi uko su•uatgen? Ua a•palchi galako , aro mandeni ga•belbelako man•ana agre mamungnaba namjaha.
14. Na•simang a•gilsakni seng•a. A•brini kosako dona songjinmako donnuna man•ja.
15. Aro manderang tochri so•e donni ning•o donja, indiba gasani kosakosa dona ; unon ua nokningo donggipa pilakna teng•sua.
16. Uandake manderangni mikkango na•simangni seng•a teng•suchina , maikai uamang na•simangni nama kamko nike na•simangni salgio donggipa Paako rasong chaatna man•gen.
17. Anga niamko aro katchinikgiparangni kattako gimaatna re•baaha ine da•chanchi ; gimaatna re•baja, indiba chu•sokatna.
18. Maina beben anga na•simangna agana, A•a aro salgi gimajana kingking, pilakan ong•jaskal niamoni on•timintiba gimajawa.
19. Uni gimin je mande ia ge•etanirangni giseponi chonbatgipa mingsako pe•gen, aro manderangna uandake skigen, uko salgini songnoko chonbatgipa ingen ; indiba je mande uarangko manigen aro skigen, uko salgini songnoko dal•gipa ingen.
20. Maina anga na•simangna agana, Sastro skigiparangni aro Pharisirangni toromna bate na•simangnin batjaode , na•simang mamung dakeba salgini songnoko napjawa.
21. Aro mande so•otnabe; so•otgipa bichalo sasti man•gni ine, skanggipa manderangna aganaha ine na•simang knaaha :
22. Indiba angade na•simangna agana, An•tang jongadako ka•onanggipa pilak mande bichalo sasti man•gni ; aro, Na•a goka ine ingipa mande wa•alni noroko sasti man•gni.
23. Uni gimin na•a ganchiona on•aniko ra•baode , aro uano an•tang jongada nang•ko maibakai matnanga ine gisik ra•ode,
24. Indide unon ganchini mikkango nang•ni on•aniko donangemung re•ange an•tang jongadamung nangrimchengkubo, ja•mano re•bae nang•ni on•aniko on•bo.
25. Nang•ko nalis ka•gipa nang•ko bichal ka•gipani jako on•jana, aro bichal ka•gipa nang•ko peadani jako on•jana , aro nang•ko patoko galjana gita, nalis ka•gipa baksa ramadilopition , un baksa bakan namgrikbo.
26. Beben anga nang•ko agana, Pai kapsakoba chotsrangjaskal na•a mamung dakeba unoni ong•katbana man•jawa.
27. Til•eknabe ine , aganaha ine na•simang knaaha :
28. Indiba angde na•simangna agana, Me•chikko sikbee nigipa mande an•tang ka•tongo un baksa til•ekman•aha.
29. Aro nang•ni jakrani mikron nang•ko ja•gidotatode , uko ote nang•oniko galatbo ; maina nang•ni be•enni bak gesa gimaan , aro nang•ni be•en gimikko noroko galgijan nang•na nambata.
30. Aro nang•ni jakra nang•ko ja•gidotatode , uko sote nang•oniko galatbo, maina nang•ni be•enni bak gesa gimaan , aro nang•ni be•en gimik norokona re•anggijan nang•na nambata.
31. Aroba agana gnang, Jiktangko galgipa pilak mande una galani lekkako see on•china :
32. Indiba angade na•simangna agana, Til•ekani a•selna agre, jiktangko galgipa pilak mande uko til•ekgipa dakata ; aro ua galgimin mechikko kimgipa mande uaba til•eka.
33. Pil•e na•a tol•e mikchetnabe , indiba Gitelna nang•ni mikchetako chu•sokatbo ine, skanggipa manderangna aganaha ine na•simang knaaha :
34. Indiba angade na•simangna agana, Mamung dakeba mikchetnabe ; salgiko rim•e mikchetnabe ; maina ua Isolni singhason ;
35. Aro a•ako rim•eba mikchetnabe ; maina ua Uni ja•arangni am•pok ; Aro Jerusalemko rim•eba mikchetnabe ; maina ua Raja dal•gipani songjinma.
36. Aro an•tang skoko rim•eba mikchetnabe ; maina kni dingsakoba bokatna ba simatna na•a amja.
37. Indiba na•simangni agana, Oe,oe ; Ihing , ihing , ong•china ; maina iarangna agre pilakan namgijagipaoni ong•a.
38. Mikronni pal mikron, aro wagamni pal wagam , ine aganaha ine na•simang knaaha ;
39. Indiba angade na•simangna agana, Nasimang namgijagipako warachaknabe ; indiba saoba nang•ni jakrani natengko satkapode, nateng samsakoba una an•pilbo.
40. Aro saoba nang•ko nalis ka•e nang•ni cholako ra•sekna skode, indide ba•ra chinakoba ra•na on•bo.
41. Aro saoba nang•ko mail sana begal rim•ode , un baksa mail gnina re•angbo.
42. Nang•o bi•gipana on•bo, aro nang•oniko ra•chakna sikgipana janggilatnabe.
43. An•tang songsulna ka•sabo, indiba bobilko mitchibo ine aganaha ine na•simang knaaha ;
44. Indiba angade na•simangna agana, Na•simang an•tangtang bobilrangna ka•sabo, aro na•simangko a•rikgiparangna bi•chakbo,
45. Maikai na•simang na•simangni salgio donggipa Paani depanterang ong•gen ; maina ua namgija aro namgiparangna antangsalko naata, aro toromi aro toromi ong•gijagiparangna mikka waata.
46. Maina na•simangna ka.sagiparangna na•simang ka•saode , na.simangni man•gni mai? Kajina gilgiparangba indaken dakjama?
47. Aro na.simang an•tangtang jongadarangkosan mangmang salam ka•ode, indide mai bataniko daka? Gipin jatrangba indake dakjama?
48. Uni gimin na•simangni salgio donggipa Paa maikai chu•sokgipa ong•a, na•simangba indaken chu•sokgipa ong•bo.